خلصت امتحانات

الحمد لله خلصت امتحانات رمد وهاخد اجازه كبيييييييييييييره جدا لحد مابدأ الروند الجاى طب شرعى

وهعيش حياتى فى الاجازه انا تعبت اوى فى الروند اللى فات بس الحمد لله الاجازه اهى جت وهتظبط

عن اذنكم هقوم شويه وارجع اكلمكم كمان يومين عشان الحق احضر نفسى للروند الجاى اللى هيبدأ يوم السبت

مش عارف حاسس كأنى بدخل روندات مصارعه كأنها جولات مش روندات

هى الناس دى بتعمل فينا كده ليه ؟؟؟؟؟؟؟؟

هو حرام ولا مش حرام

هو الحب حرام يا جماعه
انا مش قصدى على الكبل وانى اعرف بنت واقولها بحبك واخرج معاها واندمج واعيش حياتى
انا قصدى على انى اكلمها واتفق معاها انى لما اتخرج اتقدملها واخطبها رسمى
هى عايزانى اكلم والدها بعد السنه دى وافهمه على اساس انه يكون عارف
بس هل دلوقت احنا كده غلط احنا كده بنعمل جريمه مش عارف
انتم ايه رأيكم

كل البنات كدابين

كل البنات كدابين متهيألى دى الحقيقه لا هى دى الحقيقه كلهم يقولوا فى الاول انا عايزه واحد يحبنى ويخاف عليا ولما يتمكنوا وتديهم كل مشاعرك وتحبهم تلاقيهم اتغيروا خدها نصيحه منى اوعى تأمن لبنت فى حياتك انا لغاية دلوقت مش لاقيها اللى ممكن تأمنلها كلهم المهم عندهم انك تفضل تراضيهم وتدلعهم وتعملهم اللى عايزينه ولو اضايقوا تراضيهم لكن مالهومش دعوه بيك مدايق مخنوق طالع عينك حصل حاجه دايقتك تقولك سلالالالالالالالالالالالالالالالالالالالالالام انا مروحه

الدنيا حلوه واحلى سنين ...........الله الله يا ست نانسى

هو يعنى ايه حب ؟؟؟؟؟ يعنى ايه حد يكون هو كل حياتك ؟؟؟؟؟ لماتضايق منه او حتى هو يضايق منك او تحصل حاجه تزعلكم من بعض تحس ان الدنيا بقت سودا قدامك ومش شايف اى حاجه حلوه

الشعور ده حقيقى ولا احنا اللى بنشتغل نفسنا ومفيش حاجه اسمها كده اصلا والحياه اللى احنا فيها بقت كلها مصالح ومفيش حد فاضى انه يحب او يتحب واللى يحب يبقى بنى ادم تافه وفاضى الكلام ده صح مش عارف بس متهيألى لا لا لا لامعتقدش هى الدنيا بقت كده ولا فى حاجه بجد اسمها حب وفى بجد حد يستاهل انك تحبه وتعيش عشانه ولا الاصح ان اروح لامى واقولها شوفيلى عروسه ولا حتى اتجوز اى واحده كويسه والسلام وابقى احبها بالعشره بعد الجواز بس ارجع اقول ان فى ناس كتير كانت بتحب الرسول صلى الله عليه وسلم كان بيحب السيده عائشه رضى الله عنها وكانت احب زوجاته

كلام معقول طيب فى زماننا ده زمن المرتبات التعبانه والحاله الضنك ممكن نغنى زى نانسى ونقول الدنيا حلوه واحلى سنين بنعيشها واحنا يا ناس عاشقين ولا ده كله كلام تخاريف وشغل افلام انا عايز اعرف احسن نكون كدبنا كدبة وصدقناها ولا نكون مقتنعين بحاجه ملهاش وجود

انا عايز اعرف رأيكم يا زوار مدونتى المهجوره اللى معتقدش ان فى حد بيزورها غيرى بس مش مهم اهو الواحد بيكلم نفسه على سبيل انه ميتجننش

كل واحد يقول رأيه وانا مستنى ردودكم...سلام

عيد بأي حال عدت يا عيد بما مضى أم لأمـر فيك تجديد

عيد بأي حال عدت يا عيد بما مضى أم لأمـر فيك تجديد

أثارت فتوي الدكتور محمد سيد طنطاوي شيخ الأزهر التي أطلقها خلال الاحتفال بليلة القدر في حضور الرئيس مبارك، بتطبيق حد القذف وهو الجلد ٨٠ جلدة علي مروجي الشائعات- وكان يقصد الصحفيين- رفضا شديدا من قبل علماء وشيوخ الأزهر واكدوا ان «حد القذف» للزنا وليس للنشر

فقد قال الدكتور صبري عبدالرؤوف أستاذ الفقه المقارن في جامعة الأزهر عضو المجلس الأعلي للشؤون الإسلامية إن

الشريعة

الإسلامية قررت إقامة «حد القذف» علي من يقذف غيره ويرميه، بالزنا لقول المولي عز وجل: «والذين يرمون المحصنات ثم لم يأتوا بأربعة شهداء فاجلدوهم ثمانين جلدة ولا تقبلوا لهم شهادة أبدا وأولئك هم الفاسقون» صدق الله العظيم.

وأكد عبدالرؤوف أن القذف يشترط فيه أن يتعلق بالرمي بالزنا أما الإساءة بغير الرمي بالزنا فلا توجب إقامة حد القذف وإنما توجب عقوبة تعزيرية فقط.

وشدد الشيخ علي أبوالحسن مستشار شيخ الأزهر للفتوي علي أن مهمة الصحفي هي كشف الحقائق والفساد في المجتمع ولا يجوز

شرعا بأي من الأحوال المطالبة بتطبيق حد القذف عليه.

وقال أبوالحسن: إن مصلحة المجتمع في قيام الصحفي بدوره في كشف الفساد وليس في ذلك مطلقا أي عقوبة علي الصحفي لأنه يقوم بواجبه ولا يعتبر هذا مطلقا قذفا لأن حد القذف يتم تطبيقه علي الفرد الذي اتهم إنسانا معينا وسماه باسمه بارتكاب جريمة الزنا مع امرأة أخري دون أربعة شهود وهذا لا ينطبق مطلقا علي الصحافة.

واعتبر المفكر الإسلامي عبدالصبور شاهين ما طالب به شيخ الأزهر نوعاً من تسييس الفتاوى دينياً مشدداً على استقلال الأزهر عن المؤسسة السياسية حتى لا يكون موجهاً في الفتاوى الصادرة عنه مما يفقده ثقة العالم الإسلامي خاصة في ظل التراجع الكبير لمكانته العالمية بسبب ارتباطه اللصيق بالسلطة والسياسة.
وأضاف ان شيخ الأزهر مطالب بأن يعمل على أن تسود الشريعة وأحكامها المجتمع كله لا أن يتلقف قضايا جزئية ويطالب بتفعيل أحكام الشريعة فيها، متجاهلاً القضايا الأخرى تماماً،

وطالب محمد المسير أستاذ العقيدة بجامعة الأزهر إلى اختيار شيخ الجامع العتيد بالانتخاب لفصل شبهة الارتباط بين المؤسستين السياسية والدينية.

وانتقد الكاتب الصحفي فهمي هويدي في تصريح لـ «المصري اليوم» موقف شيخ الأزهر، قائلاً: «إنه ارتدي قبعة الأمن»، وأضاف: «لماذا لم نسمع صوته في التعذيب وتزوير الانتخابات»

ووصف يحيي قلاش، سكرتير نقابة الصحفيين، كلام شيخ الأزهر بأنه «فضيحة

ووصفه العبد لله -انا- بأنه الشيخ (مفتاح) او الشيخ( حلاوه) وصلوا على النبى يا كماعه الراجل برده معذور عايز يفضل على الكرسى وكل سنه وانتم طيبين وربنا مايقطعش لشيخ الازهر عاده مانا قولتلكم فى بوست قبل كده ومحدش صدقنى يا جماعه المجارى طفحت والريحه ضاربه فى العالى اوى الازهر هيضيع يا رجاله وبرده مفيش فايده

انا راجع

ناس بيسألونى ويقولوى انت مالك محدش شافك بقالك مده انا اسف يا جماعه بس غيبتى دى كانت للبلوه اللى انا بدرس فيها عندنا روند رمد بناخد الرمد فى شهرين وبعدين مش هاخد رمد تانى لحد ماموت الا لو ناويت ابقى دكتور رمد مش عارف بتوع اسنان بياخدوا طب الاسنان فى خمس سنين واحنا بناخد رمد فى شهرين وانف واذن فى شهر منه لله اللى قالى ادخل طبانا المفروض اذاكر كتاب 400 صفحه فى شهر ونص وامتحن فيه وانجح واجيب تقدير اعذرونى يا جماعه انا عامل معسكر مغلق فى بيتنا عشان اذاكر الهم اللى عليا وان شاء الله راجع على العيد فى موضوع كده هكلمك فيه اول يوم العيد فكروا بقى وشوفوا انا هكلمك فى ايه المهم انه موضوع انا شايف انه مهم ولازم نتكلم فيه يلا بقى حلوا الفزوره دى لحد مارجعلكم واكلمك فى الموضوع اللى انا عايز اكلمك فيه وانا بالمره الحق اذاكرلى 200صفحه كده فى ساعتين ادعوووووووووووولى

هذا الرجل احبــه

بسم الله الرحمن الرحيم

انا جاى اكلمكم النهارده على راجل من اعظم علماء امة الاسلام واكثرهم شرفا وامانه واللى ان شاء الله ربنا هيدخله الجنه بالمنجنيق

شوفوا جميل قد ايه ولطيف قد ايه اه لو ينفع اخليكم تسمعوه مش هتقدروا تمسكوا نفسكم من كتر التقوى اللى هوه فيها

ااااااه لو ينفع ان كل المسلمين يبقوا كده مكنتش حصلت مشاكل خلاص وكنا عشنا فى مهلبيه ورز بلبن

ده يا جماعه فضيــــــلــــــة الشيخ محمد سيد طنطاوى شيخ الازهر اللى لازال اكبر من اكبر مؤسسه اسلاميه فى الدنيا بحالها موتوا بغيظكم وقال يقولوا ان الازهر بقى فى الارض بعد شيخنا مماسكوه دى مؤامره على الاسلام

شوفوا الدنيا كلها بتقدرنا ازاى وبتحترمنا ازاى وعارفه قيمة الازهر والله احنا فى نعمه مانستاهلهاش اصل احنا ولاد .......ب

شوفوا الدماسه فى الخلق عمره ماوقف وقال لآ لحد على طول بيقول نعم بكل خشوع كأنه بيصلى بالظبط

الصوره دى لما الفرنجه كانوا عايزين يلغوا الحجاب عندهم وجم يقولوه طلعلنا فتوى بكده وطبعا شيخنا العظيم اطال الله فى عمره كمان وكمان كان لهم بالمرصاد وتصدى لآى تعدى على الحجاب ووقف وقال ............... مما يدل على مواقف الازهر العظيمه واللى خلت الدنيا كلها تقدره وتقوله .................. مما رفع من مكانة الازهر عاليااااااااا

الجامع الازهر منظره حلو بس جائنا من مصادرنا انه متهيألى من جوه فى ماسورة ضربت وهتبوظ اساسه ياريت المسئولين فى مصر المحروسه يقفلوا الماسوره قبل ما الازهر يقع علينا ومش هنلاقى جوهر الصقلى عشان يبنيه تانى



كان نفسى الكلام ده يكون حقيقى

احسن بلد بلدى ........احلى ولد ولدى

بدون تعليق

خواطر مهلبيه

يا جماعه انا شوفت شوية صور فى حتت كتيره على النت واكترها ان لم يكن كلها على مدونة مايحكمشى وعجبتنى وقولت اعرضها عندى عشان تفيد ناس اكتر وكمان اهى تعملنا شغل برده وتجبلنا زباين للمدونه

المهم فى الصور دى اتجاهات سياسيه مختلفه لاتقولى بقى اخوان ولا وطنى كله فى الاخر بيعمل خلطه اسمها مصر

المحروسه

اصحى يا نايم صحى النوم رمضاااااااان كريم

اوعى اللب سميط وبيض وجبنه فريسكــــــــــــــا
سلى نفسك يا باشا

الاخوان والمصحف فى وجه السلطه هل هذا هو الحل

حركة كفايه ..............الى اين؟؟؟؟

مش خايفين وكلام زى الراجل يطلعلى ممكن تتقال فى عركه عندنا فى الحاره بس فى السياسه معتقدش

جمجمتى العزيزه

عبد الياسط صديقى من اول يوم مادخلت كليتى العزيزه اللذيذه حضر معايا ايام معاناتى وايام البؤس والشقاء وسهر الليالى فى تلك الكليه اللعينه مع ان اصحابى فى باقى الكليات عايشين حياتهم والحياه معاهم اشطه يا مان و روشه طحن عبد الباسط ده مش واحد صاحبى ده اسم سميته للهيكل العظمى اللى عندى من اول يوم دخلت الكليه وبقى صديقى فى السراء والضراء واصبح متمثلا فى جمجمته اللى انا حاططها قدامى طول النهار وبكلمها فى مشاكلى
بدأت معاناتى لما جبت مجموع فى الثانويه العامه انا ماجبتش حاجه هما اللى ادهونى مع انى مكنتش دحيح ولا حاجه بس كنت بعرف اخلص امورى وانجز ودخلت كلية الدحيحه عيال بنضارات وبنات تقطع الخميره من البيت

انا لغاية دلوقت فاكر اول يوم شوفت فيه جدول الكليه لاقيت المفاجأه المحاضرات من 8 صباحا الى ما شاء الله مع ان باقى الكليات عندهم المحاضرات فكك وقضيها يابا ده غير انهم يعتبر عندهم السنه كلها اجازه وفى الاخر مذكره من عيل دحيح تحل اصعبها امتحان اما احنا الغلابه الكتب عندنا ولا بلاش انا لغاية دلوقت فاكر كتاب الميكروبيولوجى لما واحد صاحبى فى صيدليه شافوه معايا قالى انت يابنى خلصت كتب الكليه وبتذاكر من مراجع طب هاتلك مرجع صغير ذاكر منه مش مرجع قد دماغك فأجبته صامتا من هول الصدمه عليا

ولسه فاكر اول يوم اتجنيت فى دماغى وركبت تاكسى وانا رايح الكليه (بعد العيد نظرا لتحسن الحاله الماليه) ولما اقول لسواق التاكسى كلية الطب فيبصلى نظرة حاسد وحاقد ويوصلنى مشوار الاتنين جنيه ويقولى عشره جنيه طمعا فى الدكتور الصغنون

ولما كنت بحس ان كليتى معزولة عن باقى الكليات خوفا من انتقال الامراض الى طلبة الكليات الاخرى

ولما كنت بتصل بأصحابى فى المجمع الاقيهم يأما نايمين يأما فى كارفور ولا بلازا بيقضوا الويك اند

كل هذه ايام وعبد الباسط معايا بحس ساعات انه هيقوم من نومه العميق ويطبطب عليا ويقولى ايه اللى رماك على المر يابنى

اننى انظر الى مستقبلى ومش عارف حاجه الدكاتره دلوقت اكتر من العيانين

قعدت قبل كده مع واحد ممن سبقونى فى كفاح طيبه قصدى فى كفاح الكليه قالى على حاجات ممكن الاقيها بعد كده حبيت اقولها لعبد الباسط النهارده عشان ميموتش اكتر ماهو ميت دلوقت زى مثلا
لما احسب امتى هتجوزهكتشف ان وقتها هتكون كل البنات اتجوزت و اللى ما اتجوزشى كانوا معايا فى الكلية و طبعا مايفتحوش النفس و اللى مش معايا منهن مش هترضى بيا لان كثرة الدراسة خلتنى لا اصلح للعلاقات الانسانية
اناهكون لسه بدرس و صاحبى اللى ف تجارة خلاص بيشتغل
هكون فى الجيش و صاحبى بتاع اداب بيتجوز
هكون لسه ببدأ حياتى و صاحبى بتاع خدمة اجتماعية اتجوز و خلف 3 عيال و سافر برة يشتغل و رجع بعد طول غربة
ربنا يصبرك يا عبد الباسط ويصبرنى معاك ويارب الحق اخلص كليتى قبل ماوصل للعالم الاخر

هو فيه ايه

انا عايز اعرف هو فيه ايه

ايه اللى بيحصل فى مصر اليومين دول محدش فاهم حاجه فى اى حاجه

امبارح كنت بمارس هوايتى المفضله انا وشلة الفشله اصحابى فى الكليه كنا ماشيين على كورنيش اسكندريه بس لفت نظرى حاجه غريبه يمكن هى موجوده من زمان بس انا مكنتش حاسس بيها عشان كنت لسه عيل من بتوع مامى وبابى وباخد مصروف منهم بس دلوقت لما كبرت حسيت بيها ولا يمكن هى لسه جديده اليومين دول

المهم قعدت اتفرج على اشكال الناس اللى ماشيه فى الشارع بغض النظر على المزز اللى ماشيه على البحر دى بنات فايقه ورايقه قعدت ابص على الناس لاقيتهم بيكلموا نفسهم ومفيش اى علامة امل فى وشهم الواحد منهم كمان شويه هيجرى فى الشارع ويقعد يصوت بس ازاى وليه دى الحياه فى مصر زبادى فى الخلاط وكله تمام والشباب كلها فرحانه وكله شغال وكله لسه راجع من المصيف فى مارينا ايه بس اللى يغم فى البلد عشان كل ده

الظاهر من كتر قرايتى للجرايد القوميه جاتلى حالة هستريا هى مش برده الجرايد دى بتطلع من عندنا ولا انا مش واخد بالى اصل ساعات بيجيلى احساس انها بتطلع من احدى دول العالم المتقدم وجايبنها تصدير مع علب الكبريت الباكستانى اللى احنا بنستوردها

وجت بظروفها انى قعدت جنب واحد من هؤلاء القوم القادمون من كوكب اخر وسالته انت ليه مش مبسوط زى بقية الشعب بصلى بصه كده وحسيت انه هيصدر صوت رخيم من الانف فابتعدت قليلا وقولتله هو انا قولت حاجه زعلتك فضل باصصلى نفس البصه وقالى انت منين ياله؟!!!! قولتله انا من هنا يا عمو قالى انت عارف انا بقبض كام قولتله كام وانا منتظر مبلغ خيالى زى مالحكومه بتقول بالميت كده هيكون بيقبض 400 جنيه ولاحتى 350 بعد الخصم والذى منه ولكن قالى الصاعقه اللى حسيت ساعتها انا قفايا بردان وعايز ادفيه قالى: انا بقبض 176جنيه ومطلوب منى اكل واشرب والبس وانام واسكن واصرف على اخواتى واتجوز واربى عيالى اللى المفروض لسه عندى المقدره على انى اجيبهم (من وجهة نظره) وقالى كل سنه وانت طيب رمضان جانا والمدارس جاتنا والسنه زى الفل فسألتى نفسى حائرا انا هقبض كام

اسف قصدى سألته وانت بتعمل ايه بيهم قالى بلبس بس مش لاقى حاجه اكتر من انى كل ماقبض المرتب البس قولتله انت متجوز؟ !!بصلى نفس البصه وحسيت انه عايز يقولى انت عبيط ياله بس الحمد لله كتمها فى سره وغير الموضوع و قالى : انا مقدم على طلب هجره لاثيوبيا بيقولوا ان هناك فى شغل لو لاقيت هبقى اتجوز من هناك

حبيت بقى اقوله حبة كلام من اللى بتفرج عليهم فى البيض بيضك ولا حبة اغانى وطنيه بلدى الود ودى احضن ترابك بيدى ومتقولش ايه اديتنا مصر قول هاندى ايه لمصر

قولتله طب ماتعمر الصحرا قالى ادوها لمستثمرين يعمروها عشان احنا مالناش فيها حسيت ان مش لاقى حاجه اقولهاله غير ان يشوفلى واسطه عشان اسافر معاه اثيوبيا لانى كنت عايش فى حلم كبييييييييييييييييييييير

إنني أعرف أنني أكاد لا أعرف شيئا , و حتى هذا أكاد لا أعرفه

بسم الله الرحمن الرحيم

فى اول مقال ليا النهارده احب اعرفكم بنفسى انا طالب فى كلية طب اسكندريه مش عارف ايه اللى خلانى اعمل مدونه بس حاسس ان جوايا عايز اقولها للناس وعندى طاقه عايز اطلعها ونتيجه للكبت اللى معظم شباب اليومين دول واللى متهيألى انا منهم مع انى حاسس ان بقى عندى بتاع حاجه وسبعين سنه كده حبيت اصرخ فى وش اى ظلم واى كبت للحريه واى حاجه تمنعنى من انى اعيش حياتى زى مانا عايزها مش زى مأى حد محددلى عايز ابقى زى (سيد قراره) كده مع ان الظروف اللى انا شايفها اليومين دول حاسس ان مفيش حد بقى سيد قراره غير ناس معينه ومتهيألى هما كمان فى اللى اعلى منهم بيمشيهم كلنا ماشين فى دايره مش عارف نهايتها وانا مش عايز ابقى كده وعايز اعيش فى حريه وامن بس مش امن دوله

الايام اللى جايه هتكون مخبيالنا ايه مش عارف