Tuesday, August 24, 2010

عن موضوع الكهربا والمياه

ليه كل ماتحصل مشكله عندنا يطلع مسئول وهو لابس بدلته وبييضحك فى وشنا ضحكه صفرا كده كأنه بيقول من جواه دى عالم هبله وهتصدق ويقولك المشكله دى مش عندنا هنا بس لالالالالالالالالا دى بتحصل فى كل العالم سواء المتقدم منه أواللى راكب توك توك
او يقولنا انتوا تحمدوا ربنا على النعمه اللى انتوا فيها انتوا متعرفوش احنا بنتعب عشانكم قد ايه جتكم القرف انتوا شعبب مستهلك انتوا شعب عاله على الدوله ومش بتفيدوا البلد وعايزين تاكلوا وتشربوا كمان
ولا تلاقى واحد يقولك قطع المياه والكهربا ده حاجه كوييسه جدا فى رمضان دى بتزود من ثواب الصائم (فى كلام لازم اقوله بعد الجمله دى بس اللهم انى صائم )
وتلاقى لوحه تمنها من عشر سنين 55 مليون دولار وشوف بقى يا معلم تمنها كام دلوقت رواحد اخدها بكاتر (زى خالد صالح فى هى فوضى كده ) وعلى عينك يا تاجر ولا سحر ولا شعوذه مفيش ولا كاميرا شغاله فى المتحف ولا حته كاميرة موبايل 6600 ولا حراس ولا حتى حد واقف بيشرب شاى
المشكله مش فى تمن اللوحه الاهم هو قيمتها ومنظرنا قدام العالم ....حضارة ايه وهباب ايه اللى بنتكلم فيه واحنا مش عاملين ابسط حاجه ممكن تتعمل
اننا نحمى التراث
و الراجل كان عارف انه فى بلد (لا مؤاخذه ) وقال ان اللوحات لو متقدرتش واتحافظ عليها ترجع لاصحابها وهما هيقدروها
فعلا عنده حق
انت لو مشيت فى الشارع وسألت اى حد عن اللوحه دى ياما مش هيكون عارف ان فى حاجه اتسرقت اصلا
ياما هيكون زعلان ويقولك يا سلام 50 مليون دولار دول لو حتى 50 مليون جنيه كان زمان الواحد شبرق نفسه ولا الحوجه لسواقين الميكروباظ ...... ياريتنى كنتى انا اللى سرقتها او تلاقى حد لعبت فى دماغه الفكره وبيلف يشوفله متحف ابن حلال يلقط منه رزقه
وبعد كل ده تلاقى الناس فى مشكلة الكهربا تقولك احنا بنطالب الساده المسئولين انهم قبل ما يقطعوا الكهربا يقولولنا على الميعاد عشان نعمل حسابنا
بتفكرنى بنكته مشهوره (احنا بنطالب السيد المسئول انه يزود عدد الناس اللى هتدينا على قفانا عشان نروح بسرعه مينفعش كده احنا ورانا شغل عايين القفا بتاعنا عشان نروح )
قد كده وصلنا للدرجه دى من عدم احترام الذات قد كده بقينا قوليلين قدام نفسنا ولا احنا اتعودنا على الاهانه
اللهم وفقنا ويارب بلدنا تتقدم وترجع بلد من دول العالم التالت مره تانيه

Thursday, July 1, 2010

يعنى ايه ان الواحد يبقى زهقان

هوا يعنى ايه انك تكون زهقان ؟؟؟؟؟؟؟؟؟
ممكن كتر الفراغ يزهقك
ولا قلة الصحاب
ولا ان مبقاش فيه صحاب اصلا
ولا طبيعة الحياة اللى احنا عايشنها
ولا الكبت السياسى اللى احنا فيه
ولا الدراسه والطب وسنينه بقرفه بمحتاجاته
ولا انك تفقد حبيبتك وتعيش وحيدا شريدا محدش معبر أهلك من بعدها
ولا ده نوع من الرفاهيه انك تفكر فى راحتك النفسيه
مع ان فى ناس مش لاقيه راحتها الجسديه ولا الاجتماعيه
ساعات بحس انى مخنوق و مكنش مش عارف ايه السبب
واللى يضحك ان كونى مش عارف السبب ده بيخنقنى أكتر
يمكن قلة صحابى هى السبب ولا انى مش اجتماعى فعلطول حاسس بالوحده
زمان كانت اى مشكله تقابلنى هى تمشيه عالبحر وشوية حوار مع النفس وكله يبقى فى التمام
دلوقت اسافر واسيب اسكندريه خالص واروح مطروح ولا الساحل عشان اعمل ما يقال انه تغيير انفاس
وارجع زى ماكنت ان مكنتش أسوء
هل السبب فى ان الواحد لما بيكبر مشاكله بتكبر معاه ولا هى الوحده او لانى مش لاقى حد يفهمنى
مش عارف
اصلا انا مش عارف ايه اللى بكتبه ده ولا مين اللى هيقراه ولا ايه رد فعله لكن انا حسيت انى عايز اتكلم مع نفسى بصوت عالى

Saturday, June 26, 2010

ياااااااااااااااااااااااه

مش مصدق نفسى نفس المكان ومواضيعى القديمه ................... ايه التراب ده كله

انا فين انا فيييييييييييييييين .............. ايه ده مدونتى حبيبتى من بعد غياب رجعتلك تانى


الحمد لله

يارب الاقى صحابى القدامى ياترى هما فين دلوقت وايه اخبارهم


:)))))))))))

Saturday, May 3, 2008

مقال دخل دماغى فى المصرى اليوم


كفاية يا حاجة شادية.. فمصر لم تعد أغلي البلاد ولن أفديها أنا والولاد٣/٥/٢٠٠٨
في ٢٥ أبريل من كل عام وكعادة التليفزيون المصري أذاع الأغاني الوطنية ابتهاجاً بذكري تحرير سيناء، وكنت في الماضي أستمتع بصوت مصر شادية وهي تشدو «يا حبيبتي يا مصر»
ولكنني وجدت في هذا العام شعوراً داخلياً مختلفاً عن سابقه فلم تعد تهزني الكلمات أو تسري القشعريرة في جسدي وأنا استمع لكلمة مصر وجلست أفكر عن سر التعاسة هذه المرة
وعن سر اهتزاز صورة مصر بداخلي وهي التي كانت بالنسبة لي في الماضي صورة جميلة أبدعها الخالق الذي رسمها، بدأت أتذكر الحالة التي أصبحت عليها بعد أن أجبرت علي المعاش المبكر «الاختياري»
وفقدت وظيفتي ومصدر رزقي أنا واولادي وأصبحت أتسول أساسيات الحياة وأتعمد العودة إلي منزلي بعد أن ينام أولادي حتي لا تشعرني رغباتهم ونظراتهم بعجزي،
تذكرت أيضاً يوم تخرج ابني في كلية الحقوق بتقدير جيد واستبعد من التعيين في النيابة لعدم وجود واسطة ويوم أن عاد حزيناً بعد أن وجد أحد رفاقيه بالكلية حاصلاً علي تقدير مقبول وقد أصبح وكيلاً للنائب العام،
بينما ابني يعمل بائعا في محل.. تذكرته وتذكرت نظراته المصوبة إلي تشعرني دائماً بأنني لست الأب الذي كان ينشده، وتذكرت كيف أصبحت استدين لسداد مصاريف الدروس الخصوصية لأبنائي، لأنهم يذهبون إلي المدرسة ولا يجدون من يعلمهم حرفاً ولا نصف حرف، وينظر إليهم المدرسون في المدرسة وكأنهم جاءوا ليتسوّلوا لا ليتعلموا!
تذكرت تلك الكلمات التي يخدرنا بها أرباب النظام في كل وسائل الإعلام، كلمات كالخناجر التي سقيت بالسموم.. تذكرت أحوالي اليوم وتمنيت الموت بديلاً عن الشقاء، بعد أن أصبحنا نحيا في بلاد الحق الضائع وأصبح زماننا هو زمان القشل، والكل من حولي إذا سألوهم عن الحق الواضح،
وخشية علي مصائرهم، ينكرونه ويجحدونه، تذكرت أنني وغيري من البسطاء في هذا البلد نبحر جميعاً عكس التيار، بعد أن أصبح غالبية أبناء مصر تحت الأرض لافوقها فارتسم الحزن في العيون وأصبح غالبية المصريين بؤساء ضعفاء تائهين في الظلام لا يسأل عنهم حكامهم..
فالليل والظلمة لا يعرفهما سوي من فقد النهار، وبعد أن كانت الرغبات لدينا أمنيات، أصبحت الأمنيات وهماً، وصار الوهم حلماً وأضحي الحلم يأساً ولم يعد أحد بقادر علي إعادة الزمن الجميل لنا ووقتها أيقنت أن ما تشدو به شادية هراء.. فلم تعد بلادي أغلي البلاد ولم أعد مستعداً أن أفتديها أنا والولاد ولم يعد لساني قادراً أن ينطق كذباً يا حبيبتي يا مصر.
عصام السيد

Thursday, May 1, 2008

انا حى يا جدعان

انا معرفش ايه اللى حصلى معلش يا جماعه انا كنت بتفسح فى القناطر بس الحمد لله على كل شئ وربنا مايقطعلكوا اضراب اوعدكم انى راجع جامد وان شاء الله خير
الظاهر ان اللى عملته فى النمله طلع عليا يا جدعان
بس ياريت تكونوا لسه بتسألوا على النمله وعليا

Tuesday, November 13, 2007

خلصت امتحانات

الحمد لله خلصت امتحانات رمد وهاخد اجازه كبيييييييييييييره جدا لحد مابدأ الروند الجاى طب شرعى
وهعيش حياتى فى الاجازه انا تعبت اوى فى الروند اللى فات بس الحمد لله الاجازه اهى جت وهتظبط
عن اذنكم هقوم شويه وارجع اكلمكم كمان يومين عشان الحق احضر نفسى للروند الجاى اللى هيبدأ يوم السبت
مش عارف حاسس كأنى بدخل روندات مصارعه كأنها جولات مش روندات
هى الناس دى بتعمل فينا كده ليه ؟؟؟؟؟؟؟؟

Thursday, November 1, 2007

هو حرام ولا مش حرام

هو الحب حرام يا جماعه
انا مش قصدى على الكبل وانى اعرف بنت واقولها بحبك واخرج معاها واندمج واعيش حياتى
انا قصدى على انى اكلمها واتفق معاها انى لما اتخرج اتقدملها واخطبها رسمى
هى عايزانى اكلم والدها بعد السنه دى وافهمه على اساس انه يكون عارف
بس هل دلوقت احنا كده غلط احنا كده بنعمل جريمه مش عارف
انتم ايه رأيكم