ليه كل ماتحصل مشكله عندنا يطلع مسئول وهو لابس بدلته وبييضحك فى وشنا ضحكه صفرا كده كأنه بيقول من جواه دى عالم هبله وهتصدق ويقولك المشكله دى مش عندنا هنا بس لالالالالالالالالا دى بتحصل فى كل العالم سواء المتقدم منه أواللى راكب توك توك
او يقولنا انتوا تحمدوا ربنا على النعمه اللى انتوا فيها انتوا متعرفوش احنا بنتعب عشانكم قد ايه جتكم القرف انتوا شعبب مستهلك انتوا شعب عاله على الدوله ومش بتفيدوا البلد وعايزين تاكلوا وتشربوا كمان
ولا تلاقى واحد يقولك قطع المياه والكهربا ده حاجه كوييسه جدا فى رمضان دى بتزود من ثواب الصائم (فى كلام لازم اقوله بعد الجمله دى بس اللهم انى صائم )
وتلاقى لوحه تمنها من عشر سنين 55 مليون دولار وشوف بقى يا معلم تمنها كام دلوقت رواحد اخدها بكاتر (زى خالد صالح فى هى فوضى كده ) وعلى عينك يا تاجر ولا سحر ولا شعوذه مفيش ولا كاميرا شغاله فى المتحف ولا حته كاميرة موبايل 6600 ولا حراس ولا حتى حد واقف بيشرب شاى
المشكله مش فى تمن اللوحه الاهم هو قيمتها ومنظرنا قدام العالم ....حضارة ايه وهباب ايه اللى بنتكلم فيه واحنا مش عاملين ابسط حاجه ممكن تتعمل
اننا نحمى التراث
و الراجل كان عارف انه فى بلد (لا مؤاخذه ) وقال ان اللوحات لو متقدرتش واتحافظ عليها ترجع لاصحابها وهما هيقدروها
فعلا عنده حق
انت لو مشيت فى الشارع وسألت اى حد عن اللوحه دى ياما مش هيكون عارف ان فى حاجه اتسرقت اصلا
ياما هيكون زعلان ويقولك يا سلام 50 مليون دولار دول لو حتى 50 مليون جنيه كان زمان الواحد شبرق نفسه ولا الحوجه لسواقين الميكروباظ ...... ياريتنى كنتى انا اللى سرقتها او تلاقى حد لعبت فى دماغه الفكره وبيلف يشوفله متحف ابن حلال يلقط منه رزقه
وبعد كل ده تلاقى الناس فى مشكلة الكهربا تقولك احنا بنطالب الساده المسئولين انهم قبل ما يقطعوا الكهربا يقولولنا على الميعاد عشان نعمل حسابنا
بتفكرنى بنكته مشهوره (احنا بنطالب السيد المسئول انه يزود عدد الناس اللى هتدينا على قفانا عشان نروح بسرعه مينفعش كده احنا ورانا شغل عايين القفا بتاعنا عشان نروح )
قد كده وصلنا للدرجه دى من عدم احترام الذات قد كده بقينا قوليلين قدام نفسنا ولا احنا اتعودنا على الاهانه
اللهم وفقنا ويارب بلدنا تتقدم وترجع بلد من دول العالم التالت مره تانيه
5 comments:
حلوة التدوينة دى ..فى الجون .
بس انا بيتهيألى اننا مش هنقدر فعلاً نتقدم غير لما تفرج عن النملة اللى انت حابسها و بتعذبها :))))
هع هع هع
هتقول لمين ومين هيسمع يا مجرم
ههههههههههههههههه
هى دى مصر يا عبله
قولى بقا انت هتفضل معذب النمله كتير كده
مش ناوى تفرج عنها
يعنى هى جت على النمله ........... خلوها اهو اطلع فيها الكبت اللى عندى
:)))))
والله مبقناش عارفين نقول ايه
ولا ايه ولا مية المجاري اللي بيشربوهالنا وبيسقو بيها الزرع
مافيش فايدة
افتكرت حال مصر ايام سيدنا موسى لما الناس بقت حياتها ضفادع ودم وقمل وجراد
اكيد العيب فينا
يلا كل سنة وانت طيب
إيه ده هو في حاجه اتسرقت ؟
يلا اللي خلا الواحد بيسرق نفسه اساساً .. وبيتسرق برده 25 ساعه يومياً..
والله لو فكرت ف كل حاجه في حياتك هتحس انهم بيخيروك بين حاجتين .. ياتتسرق ياتتسرق ..
الكهربه بقى .. تسدق إحنا شعب جاحد ف الموضوع ده .. يعني حر وقلنا ثواب الحمدلله .. ومايه تقطع .. كله بثوابه وكهربا تقطع .. ربنا يزودنا كمان وكمان
انت عمرك شفت حكومه بتخاف على شعبها كده ؟
بتحبلنا الخير دنيا واخره .. وبتفكر إزاي تزودلنا حسنات :)
اممممم .. شعب نمرود بالفعل !!
ربنا يفتكرهم جميعاً بدري بدري ياااااارب ..
Post a Comment